Հունիսի 16-ին ժամը 12 00 «Հայացք» մամուլի ակումբի հյուրերն էին Հոգեսոցիալական կարգավորման կենտրոնի հոգեբան Սոնա Հարությունյանը և Արմենիա հանրապետական բժշկական կենտրոնի մաշկաբան, սեռավարակաբան Կարեն Վարդանյանը:
Թեման՝ Հանգստի նախապատրաստման հոգեբանական և առողջական ասպեկտները:
Հոգեբան Սոնա Հարությունյանը նշեց, որ հանգիստն անհրաժեշտ նախապայման է առողջության պահպանման, վերականգնման, նաև աշխատանքային գործունեության արդյունավետության համար: Հետևաբար, այն լուրջ վերաբերմունք է պահանջում իր նկատմամբ: Նախևառաջ, հանգստին նախապատրաստում, որն էլ լիարժեք հանգիստ ապահովելու և հետհանգստյան սինդրոմից խուսափելու միջոց է: Լիարժեք հանգիստն իր մեջ ներառում է` հանգստի տևականություն և բովանդակություն: Ընդունված է` հանգստի նվազագույն ժամանակ համարել 2 շաբաթը, նորմա`3 շաբաթը: Հանգստի բովանդակությունը խիստ անհատական է, այն կախված է անձնային առանձնահատկություններից, հետաքրքրություններից, նախասիրություններից, աշխատանքի բնույթից և այլն: Հոգեբանը հավելեց, որ չկա հանգստի լավ կամ վատ տեսակ, ոմանք նախընտրում են ակտիվ հանգիստը, ոմանք` պասիվ: Սովորաբար հանգստից բավարարվածություն ունենում են նրանք, ովքեր հանգիստը պլանավորելիս առաջնորդվում են սեփական հոգեբանական առանձնահատկություններով: Հոգեբանը նշեց նաև հետհանգստյան սինդրոմի և աշխատանքին անցնելու ադապտացիայի դժվարությունների մասին:
