Հոգեկան առողջության ոլորտի բարեփոխումների ծրագրով նախատեսվում է հիմնել խնամքի կենտրոններ:
Առաջին անգամ վրձինը ձեռքը վերցրեց ու ամպեր նկարեց: Սպիտակի խնամքի տան բնակիչ Վահագնն իր առաջին նկարը «Սեր» անվանեց: Մասնագիտական կրթությունը կիսատ թողած հոգեբանը որոշել է շարունակել ուսումը, նկարում է, նաև` աշխատում: Հայաստանում հաշվառված է հոգեկան առողջության խնդիրներ ունեցող 50 հազար մարդ: Նրանց խնամքն ու անհրաժեշտ բուժօգնությունն իրականացվում է պետպատվերով: Բավարար առողջական վիճակում գտնվող, բայց դեռևս մասնագիտական խնամքի կարիք ունեցողները փակ հոգեբուժական հաստատություններից տեղափոխվում են հասարակական շփումների համար բաց խնամքի կենտրոն:
Հոգեկան առողջության միամսյակի ընթացքում հոգեբաններն ու հոգեթերապևտները քննարկում են խնդիրները: Կադրերի պակասն ու հոգեբուժական հաստատություններում կենցաղային անբավարար պայմանները` բարեփոխումների օրակարգում են:
Ոլորտի պատասխանատուները վստահեցնում են, որ բարեփոխումները կլինեն շարունակական: Առաջիկայում Սպիտակի խնամքի տան մոդելով կենտրոններ ու կացարաններ կկառուցվեն նաև Հայաստանի մյուս մարզերում:
